Rusia ka sulmuar sërish disa qytete ukrainase.
Qyteti jugor i Ukrainës, Mykolaiv, është “bombarduar masivisht” gjatë natës, tha kryetari i bashkisë së qytetit Oleksandr Senkevych në Telegram mëngjesin e së enjtes.
“Një ndërtesë banimi pesëkatëshe u godit. Dy nga katet e sipërme të saj u shkatërruan plotësisht, dhe pjesa tjetër është e mbuluar me rrënoja,” tha Senkevych.
Ai tha se ekipet e shpëtimit po punojnë në vendngjarje. Kryebashkiaku nuk tha nëse ka të lënduar apo të vdekur.
Një tjetër qytet jugor, Nikopol, gjithashtu raportoi bombardime gjatë natës, sipas postimit në Telegram nga anëtari i parlamentit ukrainas Oleksiy Goncharenko.
Goncharenko tha se një burrë 59-vjeçar u plagos dhe rreth 30 ndërtesa të larta dhe shtëpi private u dëmtuan, duke lënë rreth 2,000 familje pa energji elektrike.
Sulmet e fundit pasojnë tre ditë radhazi të sulmeve vdekjeprurëse ruse në infrastrukturën civile në të gjithë Ukrainën.
