Australia ka anuluar një vendim të marrë katër vjet më parë për të njohur Jerusalemin Perëndimor si kryeqytet të Izraelit.
Vendimi i Canberras në vitin 2018 kishte minuar paqen dhe e kishte vendosur Australinë jashtë hapit me vendet e tjera, tha Ministrja e Jashtme Penny Wong.
Ajo theksoi se Australia mbetet një “mik i palëkundur” i Izraelit. Ambasada e saj do të qëndrojë në Tel Aviv.
Statusi i Jerusalemit është një nga çështjet më të kontestuara mes Izraelit dhe palestinezëve.
Ministria e Jashtme e Izraelit ka shprehur “zhgënjimin e saj të thellë” për vendimin e Australisë dhe do të thërrasë ambasadorin e saj, njoftuan mediat izraelite.
Ish-presidenti amerikan Donald Trump mori kritika ndërkombëtare në vitin 2017, kur ai përmbysi dekada të politikës së jashtme amerikane duke e njohur qytetin antik si kryeqytetin e Izraelit. Ambasada amerikane u zhvendos nga Tel Avivi në Jerusalem në maj të vitit 2018.
Muaj më vonë, kryeministri i atëhershëm i Australisë Scott Morrison njoftoi se Qeveria e tij do të ndiqte shembullin.
Në atë kohë, Morrison tha se Australia do ta njohë Jerusalemin Perëndimor menjëherë, por nuk do ta zhvendosë ambasadën e saj nga Tel Avivi derisa të arrihet një zgjidhje paqeje.
