Misteri rrethon vdekjen e një bashkëpunëtoreje të ngushtë të Vladimir Putin. Një zyrtare në sektorin e mbrojtjes të presidentit rus është gjetur e vdekur, pasi besohet se ka rënë nga kati i 16-të i një ndërtese nga një lartësi prej gati 48 metrash, duke lënë pas një sërë dokumentesh.
Marina Yankina, 58 vjeç, u gjet e vdekur nga një kalimtar në hyrje të ndërtesës në Shën Petersburg, pasi raportohet se ra nga dritarja.
Komiteti Hetimor Rus dhe shërbimi për shtyp i Qarkut Ushtarak Perëndimor “Fontanka” konfirmuan vdekjen e saj dhe po hetojnë shkakun e rënies së saj.
Yankina ishte një nga figurat kryesore në financimin e luftës në Ukrainë, sipas Daily Mail.
Ajo ishte kreu i departamentit të mbështetjes financiare të Ministrisë së Mbrojtjes për Qarkun Ushtarak Perëndimor, i cili është i përfshirë ngushtë në pushtimin e Ukrainës.
Para se të bashkohej me Qarkun Ushtarak Perëndimor, Yankina punoi në Shërbimin Federal të Taksave dhe gjithashtu shërbeu si Zëvendës Kryetare e Komitetit të Marrëdhënieve Pronësore të Shën Petersburgut.
Vdekja e saj misterioze i shtohet listës tashmë të gjatë të vdekjeve zyrtare gjatë sundimit të gjatë të Putinit.
Vetëm javën e kaluar, gjeneralmajor Vladimir Makarov,një gjeneral rus i shkarkuar së fundmi nga Putin, u gjet i vdekur në rrethana misterioze.
Po ashtu dhjetëra biznesmenë rusë janë gjetur të vdekur që nga fillimi i vitit 2022 në rrethana të pashpjegueshme. Shumica u karakterizuan si vetëvrasje
© SYRI.net
