Sekretari i Përgjithshëm i NATO-s, Jens Stoltenberg tha se Vladimir Putin po “përgatitet për më shumë luftë” në përgjigje të fjalimit të presidentit rus të martën. Stoltenberg gjithashtu vuri në dukje se aleanca është “gjithnjë e më shumë e shqetësuar” se Kina po planifikon të mbështesë Rusinë.
“Është Presidenti Putin ai që filloi këtë luftë perandorake pushtuese. Është Putin ai që vazhdon të përshkallëzojë luftën në këtë mënyrë”, tha Stoltenberg në një konferencë për shtyp në Bruksel të martën, së bashku me ministrin e Jashtëm ukrainas Dmytro Kuleba dhe shefin e politikës së jashtme të Bashkimit Europian, Josep Borrell.
“Një vit që kur nisi pushtimin, ne nuk po shohim asnjë shenjë se presidenti Putin po përgatitet për paqe.
Përkundrazi, siç e bëri të qartë sot, ai po përgatitet për më shumë luftë.”
“Rusia po fillon ofensiva të reja, po mobilizon më shumë trupa dhe po bashkëpunon me Korenë e Veriut dhe Iranin”, tha Stoltenberg.
“Ne jemi gjithashtu gjithnjë e më të shqetësuar se Kina mund të mbështesë me armë vdekjeprurëse luftën e Rusisë.”
Stoltenberg u bëri jehonë komenteve të mëparshme në lidhje me mbështetjen për Ukrainën, duke vlerësuar “njoftimet e fundit nga aleatët për tanke të reja, armatime të rënda dhe stërvitje për trupat ukrainase”, duke deklaruar se është “urgjente të përmbushen të gjitha këto premtime”.
“Ne duhet t’i japim Ukrainës atë që i nevojitet për të fituar dhe për të mbizotëruar si një komb sovran i pavarur në Europë”, shtoi Stoltenberg.
Stoltenberg tha se ai, Kuleba dhe Borrell diskutuan rritjen e prodhimit për të vazhduar mbështetjen e Ukrainës gjatë bisedimeve të së martës.
