Kaq nxehtë, sa mund të piqni hamburger në kofanon e makinës: kështu e përshkruajnë mediat amerikane valën e të nxehtit që po afrohet pjesëve të ndryshme të vendit me temperatura rekord, ndërsa 100 milionë banorë janë paralajmëruar të përgatiten për mot përvëlues.
Fronti nxehtë i nisur nga jugperëndimi po lëviz drejt rajoneve qendrore, e rezultati i tij janë temperature te cilat variojnë nga 10 deri në 30 gradë mbi normalen për këtë periudhë të vitit.
Shërbimi kombëtar i Meteorologjisë paralajmëron për një kombinimin të rrezikshëm të nxehtësisë me lagështirën në ajër, që do të prekë një shumicë shtetesh përpara se java të mbyllet.
Në alarm janë Arkansas, Kentucky, Missouri, Mississippi, Illinois, Iowa e Indiana, si dhe pjesë të një duzine shtetesh të tjera. Në disa zona, termometri llogaritet t`i afrohet 40 gradëve Celsius.
“Nxehtësia e vazhdueshme, aq më tepër në kushtet e një lagështie të madhe në ajër mund të shkaktojë sëmundje, e të preke personat më të cenueshëm”, paralajmëruan autoritetet.
Shërbimi i motit në Pitsburg tha se kjo valë të nxehti mund të lëvizë në të gjithë Pensilvaninë perëndimore, e shoqëruar edhe me stuhi: “Nëse nuk jeni adhurues i nxehtësisë, epo mirë, janë vetëm 192 ditë deri në natën e parë të dimrit,” u shprehen punonjës të tij duke i shtuar njoftimit edhe ca doza humori.
