Qyteti i Nju Jorkut ka miratuar një projektligj që nxjerr jashtë ligjit diskriminimin në bazë të peshës, duke iu bashkuar një lëvizjeje në rritje në SHBA për ta bërë madhësinë trupore një tipar të mbrojtur në të njëjtin nivel me racën dhe gjininë.
Më shumë se 40% e të rriturve amerikanë konsiderohen obezë dhe studimet tregojnë se stigma e peshës është e përhapur.
Paragjykimi mund të sjellë kosto të tilla si paga më të ulëta, veçanërisht për gratë.
Këshilltari i qytetit Shaun Abreu tha se diskriminimi i peshës ishte “një barrë e heshtur që njerëzit duhej të mbanin”.
Gjatë seancave dëgjimore, mbështetësit përmendën vështirësinë në vende si restorante dhe teatro, duke mos u pranuar nga pronarët dhe duke u përballur me kufijtë e peshës në programin e ndarjes së biçikletave të qytetit.
Këshilltari Abreu, i cili sponsorizoi projektligjin, tha se ai u bë më i vetëdijshëm për këtë çështje kur fitoi më shumë se 18.1 kg dhe pa një ndryshim në mënyrën se si trajtohej. Ai tha se mungesa e mbrojtjeve kishte përforcuar problemet me të cilat përballen njerëzit.
“Ata janë duke u diskriminuar pa asnjë zgjidhje dhe shoqëria thotë se kjo është krejtësisht mirë,” tha ai.
Masa pritet të nënshkruhet në ligj nga kryebashkiaku i Nju Jorkut më vonë këtë muaj.
Udhëheqësi i pakicës në këshillin e qytetit të Nju Jorkut, Joseph Borelli, i cili është një republikan, i tha New York Times se ishte i shqetësuar se ligji do të fuqizonte njujorkezët “të padisën këdo dhe gjithçka”.
“Unë jam mbipeshë, por nuk jam viktimë. Askush nuk duhet të ndihet keq për mua, përveç kopsave të këmishës sime”, tha ai.
Ligji për të drejtat e njeriut në Nju Jork tashmë ndalon diskriminimin në strehim, vendin e punës dhe akomodimin publik bazuar në 27 karakteristika, duke përfshirë moshën, statusin martesor, aftësinë e kufizuar dhe origjinën kombëtare.
Projektligji shton peshën dhe gjatësinë në këtë listë, duke përfshirë përjashtime për punët në të cilat pesha dhe gjatësia janë një “kualifikim profesional i mirëfilltë” ose ku ka një shqetësim për shëndetin dhe sigurinë publike.
Top Channel
