Edhe Turqia është në heshtje zgjedhore. Pas një fushatë intensive udhëheqësit politikë mbyllën tubimet dhe fushatën e tyre për zgjedhjet presidenciale dhe ato te përgjithshme një ditë më parë.
Zgjedhjet e nesërme në Turqi do të jenë vendmtare për të ardhmen politike të presidentit Rexhep Tajip Erdogan dekadat e të cilit në pushtet kanë riformatuar politikën e Turqisë dhe rolin e saj në çështjet globale.
Gjatë fushatës presidenti turk ka insistuar se e ka mbajtur Turqinë në këmbë pavarësisht sfidave, duke përfshirë gjendjen ekonomike për shkak të inflacionit dhe tërmetet shkatërruese të muajit shkurt.
Gara parashikohet të jetë e fortë, pasi Erdogan është vendosur kundër një opozite të bashkuar me rivalin kryesor Kemal Kilicdaroglu i cili përshkruhet si një njëri i butë, që është zotuar të rivendosë demokracinë .Erdogan është lideri që ka dominuar politikën turke për 20 vitet e fundt.
Më shumë se 64 milionë njerëz pritet të votojnë brenda dhe jashtë vendit. Për të fituar plotësisht një kandidat duhet të sigurojë më shumë se gjysmën e votave.
Nëse asnjë kandidat nuk merr të paktën 50% plus një votë në raundin e parë, zgjedhjet presidenciale do të shkojnë në një raund të dytë më 28 maj midis dy atyre që kanë marrë më shumë vota.
Për zgjedhjet e përgjithshme do të garojnë 24 parti dhe 151 kandidatë të pavarur për deputetë.
