Sipas një deklaratë të Kombeve të Bashkuara, çmimet e ushqimeve në muajin maj shënuan nivelin më të ulët në dy vjet. Indeksi i çmimeve të Organizatës së Ushqimit dhe Bujqësisë (FAO), i cili monitoron çmimet e ushqimeve në mbarë botën, ishte mesatarisht 124.3% në maj kundrejt 127.7% muajin e kaluar.
Ky është çmimi më i ulët që nga prilli 2021 dhe do të thotë se indeksi tani është 22% nën nivelin më të lartë të të gjitha kohërave që arriti në mars 2022 pas fillimit të pushtimit rus të Ukrainës.
Çmimi i drithërave ra gati 5% në maj nga një muaj më parë, por çmimet ndërkombëtare të orizit vazhduan të rriten në maj. Çmimi i sheqerit u rrit 5.5% nga prilli për të katërtin muaj radhazi, pasi shqetësimet për fenomenin e motit El Nino shtuan rreziqet e furnizimit global, tha FAO.
Megjithatë, përmirësimi i kushteve të motit në Brazil dhe çmimet më të ulëta të naftës së papërpunuar kufizuan çmimin e sheqerit në tregje.
Në një raport të veçantë mbi ofertën dhe kërkesën për drithëra, FAO bëri parashikimin e saj për prodhimin global të drithërave këtë vit në 2.813 miliardë ton, 1% më shumë nga viti 2022 kryesisht për shkak të një rritjeje të pritshme të prodhimit të misrit.
Rezervat globale të drithërave për 2023/24 pritet të rriten me 1.7% nga viti në vit në një rekord prej 873 milionë tonësh, të nxitura nga stoqet më të larta të pritshme të misrit, orizit dhe elbit.
Megjithatë, rezervat e grurit pritet të shënojnë rënie të prodhimit ndërsa kërkesa pritet të mbetet e qëndrueshme.
