Presidenti i Rusisë, Vladimir Putin, nënshkroi një dekret për pezullimin e disa dispozitave të traktateve ndërkombëtare të taksave me 38 shtete, të etiketuara nga Moska si armiqësore, mes të cilave edhe Shqipëria, thuhet në një dokument të publikuar të martën në portalin e informacionit ligjor të qeverisë ruse.
“Bazuar në nevojën për të marrë masa urgjente në lidhje me kryerjen e veprimeve armiqësore nga shtete të ndryshme të huaja kundër Rusisë, shtetasve dhe personave juridikë të saj, vendos të pezulloj dispozitat e mëposhtme të traktateve ndërkombëtare”, thuhet në teks.
Deri më tani janë anuluar marrëveshjet për shmangien e taksimit të dyfishtë me pothuajse të gjitha vendet e Bashkimit Evropian: Spanjë, Itali, Portugali, Gjermani, Belgjikë, Kroaci, Danimarkë, Francë, Irlandë, Luksemburg, Suedi, Bullgari, Sllovaki, Greqi. Malta, Polonia, Republika Çeke, Austria, Qiproja, Sllovenia, Finlanda, Hungaria, Lituania dhe Rumania.
Po kështu, anulimi prek Shtetet e Bashkuara, Mbretërinë e Bashkuar, Kanadanë, Australinë, Zelandën e Re, Zvicrën, Norvegjinë, Korenë e Jugut, Japoninë, Singaporin, Islandën, Shqipërinë, Malin e Zi dhe Maqedoninë e Veriut.
Konkretisht, dekreti presidencial pezullon ligjet që rregullojnë taksimin e pasurive të luajtshme dhe të paluajtshme, dividentët, interesat, të ardhurat nga shërbimet dhe të drejtat e autorit, tarifat dhe të ardhurat nga puna, si dhe taksat mbi kapitalin.
Sipas dokumentit, ky vendim është marrë për të parandaluar taksimin e dyfishtë dhe “evazionin fiskal në drejtim të taksave mbi të ardhurat dhe pasurinë”.
Putini udhëzoi Ministrinë e Jashtme ruse që të njoftonte këto vende për vendimin dhe qeverinë t’i dorëzonte Dumës së Shtetit (Dhomës së Ulët të Parlamentit rus) një projekt-ligj për pezullimin e dispozitave.
Në mars 2022, Putin po ashtu firmosi një dokument të listës së vendeve “jomiqësore” të Rusisë.
Në listën e shpallur, renditen shtetet që vendosën ose iu bashkuan sanksioneve kundër Rusisë pas fillimit të pushtimit në Ukrainë. Mes tyre është edhe Shqipëria.
Lista vjen pas një dekreti presidencial të nënshkruar më 5 mars, që lejon Qeverinë, kompanitë dhe qytetarët rusë të paguajnë borxhet në valutë të huaj, që u detyrohen kreditorëve të huaj nga “vendet jomiqësore” në rubla.
Për të bërë pagesa të tilla, Qeveria shpjegoi se debitorët duhet të hapin një lloj të veçantë llogarie rubla në një bankë ruse dhe të transferojnë në të ekuivalentin e rublës së shumës së monedhës së huaj – që i detyrohet – sipas kursit zyrtar të këmbimit të bankës qendrore në ditën e pagesës.
