Qeverinë e pret një shtator djallëzor. Tashmë janë paralajmëruar një sërë grevash dhe protestash për të ardhura më të larta. Punonjësit e administratës gjyqësore do të jenë të parët në grevë të përgjithshme. Do të ketë protesta të përjetshme për paga të mira në shëndetësi, me shumë gjasa në arsim, dhe të fundit që shprehin pakënaqësinë janë pensionistët, të cilët nuk heqin dorë nga kërkesa për rritje lineare të pensioneve.
Punëtorët po ngrenë zërin për paga më të larta. Nga 1 shtatori, të gjithë paralajmërojnë, siç thonë ata, një vjeshtë të “nxehtë”, për shkak të të ardhurave të ulëta dhe çmimeve të larta të gjithçkaje. Pas rritjes enorme të pagave të zyrtarëve për 78% dhe pas rritjes së çmimeve, po vlon nga pakënaqësia tek punëtorët, nga të gjithë sektorët e vendit. Administrata publike, shëndetësia, gjyqësori, gazetarët, kuadri mjekësor kërkojnë paga më të larta. Sindikatat paralajmërojnë një vjeshtë të nxehtë me protesta dhe greva për të siguruar një jetë të denjë dhe që sa më shumë punëtorë të marrin një pagë dinjitoze.
“Me një sistem mund të vendoset rendi, por kjo pas amendamentit që tashmë e kemi dorëzuar në Kuvend. Ne propozojmë që rritja e pagave të punonjësve dhe zyrtarëve të sektorit publik të bazohet në parime të barabarta pa diskriminim në përputhje me parimet e dakorduara në Marrëveshjen e Përgjithshme Kolektive për Sektorin Publik dhe rregullat për punëtorët duhet të zbatohen në mënyrë të barabartë për zyrtarët, kështu që nëse Qeveria konsideron rritje të pagave prej 10% nga shtatori 2023 dhe përcaktimin e metodologjisë për llogaritjen e pagave”, thotë nënkryetari i Sindikatës së Maqedonisë, Ivan Peshevski.
Të fundit në radhë për të kërkuar paga më të larta dhe kushte normale pune janë punonjësit në arsim, të cilët nuk përjashtojnë mundësinë që fillimi i vitit të ri shkollor të nisë me grevë. Përveç pagave, shkak është edhe mungesa e teksteve për fëmijët e klasave të treta dhe të gjashta.
“Bëhet fjalë për një pakënaqësi të madhe që mbizotëron në shkollat fillore dhe të mesme, si pasojë e 10% të ulët që ofron qeveria përmes marrëveshjes së përgjithshme kolektive. Ka gjasa të mëdha që viti shkollor të fillojë me grevë, ne si Sindikatë e Pavarur për Arsim dhe Shkencë po punojmë në mënyrë aktive që të mbledhim forca që të mund ta realizojmë atë proces. Revolta është edhe për pagën e ulët, nën mesatare, ndërsa më e madhja është revolta e pedagogëve për mosrespektimin e marrëveshjeve kolektive”, thotë Tomisllav Gievski nga Sindikata e Pavarur për Arsim dhe Shkencë.
Edhe punonjësit e shëndetësisë kanë paralajmëruar protesta, duke kërkuar një pagë 30% më të lartë për të gjithë, nga higjenistët e deri te mjekët.
“Në takim u vendos që në marrëveshjen kolektive ka një sërë anomalish sa i përket punëtorëve shëndetësorë, personelit administrativ shëndetësor dhe personelit teknik, të cilat duhet të zgjidhen gradualisht”, tha koordinatori nacional për sindikatat e pavarura shëndetësore, Bobi Bojçevski.
Prej shtatorit edhe punonjësit e administratës gjyqësore kanë njoftuar grevë të përgjithshme. Ata kërkojnë rritje të pagave me 30%. Krahas punëtorëve, pakënaqësia ka eskaluar edhe te pensionistët, të cilët janë tejet të revoltuar nga rritja e madhe e pagave të zyrtarëve. Ata kërkojnë rritje lineare të pensioneve për 3500 denarë, e jo rritje në përqindje prej 6,8%, që, siç thanë, ishte poshtëruese.
“Unë marr 12.800 denarë – me ato para nuk mund të jetohet. Edhe 3500 denarë janë pak, të paktën 5000 denarë të rriten. Nuk di ku t’i jap paratë – për rrymë, për ujë apo për plehrat”, thotë një pensionist që mori pjesë në protestë.
Sipas përllogaritjeve të fundit të LSM, një familje prej katër anëtarësh i nevojiteshin mbi 50.000 denarë për të mbijetuar, që do të thotë, për të mbijetuar – duhen dy paga mesatare, para që vështirë se dikush i merr. \Flaka\
