Në një udhëtim të rrallë jashtë vendit, Kim do të udhëtonte nga Pheniani, mbase me tren të blinduar, për në Vladivostok, në Bregun e Paqësorit të Rusisë, ku do të takohej me Putinin, raportoi të hënën New York Times, duke u mbështetur në burime të SHBA-ve dhe aleatëve.
Në Vladivostok, një qytet port jo larg Koresë së Veriut, të dy udhëheqësit do të diskutojnë dërgimin e predhave të artilerisë dhe raketave antitank nga ana e Koresë në këmbim të teknologjisë së avancuar të Moskës për satelitët dhe nëndetëset me energji bërthamore, raporton gazeta.
Të hënën, shërbimi i inteligjencës i Koresë së Jugut informoi se Shoigu i kishte sugjeruar Rusisë, Kinës dhe Koresë së Veriut të zhvillonin stërvitje të përbashkëta detare, të ngjashme me ato të kryera nga SHBA, Koreja e Jugut dhe Japonia.
Një frikë tjetër është se Rusia mund të furnizojë Korenë e Veriut me armë në të ardhmen, në një kohë kur Pheniani ka më shumë nevojë për to.
Akoma më shqetësuese, Kim Jong Un mund t’i kërkojë Putinit t’i sigurojë atij teknologji ose njohuri të avancuara të armëve, për ta ndihmuar atë të bëjë përparime në programin e tij të armëve bërthamore.
Megjithatë, një marrëveshje mund të përfundojë më shumë transaksionale sesa strategjike. Tani për tani, Rusia ka nevojë për armë, kurse Koreja e Veriut për shkak të sanksioneve është e uritur dhe ka nevojë për ushqim dhe para.
Shtetet e Bashkuara vendosën kohët e fundit sanksione ndaj tre subjekteve që i akuzuan se ishin të lidhura me marrëveshjet e armëve midis Koresë së Veriut dhe Rusisë.
