Qeveria izraelite njoftoi se ka dhënë ‘dritën jeshile’ për të thirrur rreth 360 mijë rezervistë të ushtrisë në mes të luftimeve me grupet palestineze në Gaza, transmeton Anadolu.
Sipas faqes së internetit të lajmeve “Ynet”, ushtria izraelite ka dërguar avionë të forcave ajrore për të mbledhur rezervistët nga Evropa për t’u bashkuar me ushtrinë.
Ndërkohë, në një deklaratë tjetër, një zyrtar i ushtrisë izraelite këshilloi palestinezët të largohen nga Gaza drejt Egjiptit në mes të luftimeve të vazhdueshme dhe operacioneve të mundshme tokësore kundër Gazës.
“Kalimi Rafah është ende i hapur. Kushdo që mund të dalë, unë do t’i këshilloja të dilnin”, citoi “Times of Israel” të ketë thënë zyrtari i ushtrisë, Richard Hecht.
Grupi palestinez Hamas nisi operacionin “Tufani i Aksa-së” kundër Izraelit herët të shtunën, duke lëshuar breshëri raketash dhe duke u infiltruar në Izrael nga toka, ajri dhe deti. Hamasi tha se sulmi i befasishëm ishte në përgjigje të bastisjeve në Xhaminë Al-Aksa në Kudsin Lindor të pushtuar dhe rritjes së dhunës së kolonëve kundër palestinezëve.
Si hakmarrje, ushtria izraelite nisi operacionin “Shpatat e Hekurta” kundër Hamasit në Rripin e Gazës.
Numri i palestinezëve të vrarë nga forcat izraelite në Gaza është rritur në 704, përfshirë 143 fëmijë dhe 105 gra, tha sot herët Ministria e Shëndetësisë me bazë në Gaza. Ndërkaq, numri i të plagosurve është rritur në rreth 4.000.
