Shefi i Organizatës Botërore të Shëndetësisë, Tedros Adhanom Ghebreyesus i ka kërkuar Egjiptit të ndihmojë në transferimin e furnizimeve mjekësore në Gazën fqinje ndërsa kriza humanitare në enklavë thellohet nën bombardimet izraelite.
Ghebreyesus tha se presidenti egjiptian Abdel Fattah El-Sisi kishte rënë dakord të ndihmonte në transferimin e furnizimeve mjekësore përmes vendkalimit që lidh Egjiptin me Gazën jugore.
“Jam vërtet i shqetësuar. Zemra ime shkon për të gjithë ata që kanë humbur jetën dhe familjet e tyre nga Izraeli dhe Palestina. Ky është një moment shumë i trishtuar“- u tha ai gazetarëve në Lyon, Francë.
Nën rrethimin izraelit, i vetmi korridor përmes të cilit palestinezët ose ndihmat mund të kalojnë brenda dhe jashtë Gazës është Kalimi Rafah që kufizohet me Egjiptin. Egjipti mohoi të enjten raportet për mbylljen e kalimit, duke thënë se megjithatë ka pësuar dëmtime për shkak të sulmeve të përsëritura ajrore izraelite në anën palestineze të kufirit.
CNN nuk mundi të verifikonte në mënyrë të pavarur nëse kalimi është i hapur.
