Beogradi vijon të përjetojë momente paniku pas dy sulmeve me armë gjatë muajit të fundit ku të paktën 17 persona humbën jetën teksa shumë të tjerë mbetën të plagosur.
Një tjetër ngjarje e rëndë është regjistruar mbrëmjen e së hënës në kryeqytetin serb, gjatë së cilës mbetën të plagosur 2 persona nga një breshëri të shtënash pranë një restoranti.
Një person i paidentifikuar hapi zjarr në rrugën “Maksim Gorki” duke pasur si synim një 26 vjeçar dhe plumbat zunë dhe një kalimtar, shkruan tanjug.rs.
Arsyet janë ende të paqarta dhe autori u largua me shpejtësi, ndërkohë që policia është ngritur në gatishmëri dhe ka rrethuar kryeqytetin për të arrestuar.
Nga të shtënat me armë zjarri mbrëmë në Beograd është plagosur edhe shtetasi i Maqedonisë së Veriut D.L. (21).
Siç raportojnë mediat serbe, shtetasi i Maqedonisë është viktimë krejtësisht aksidentale nga të shtënat me armë zjarri, ku mbeti i plagosur A.P. (26).
Menjëherë në vendngjarje ka mbërritur autoambulanca, ndërsa shtetasi RMV-së ka marrë plagë me armë zjarri në shpinë.
