Pasi personat me diabet nuk morën shirita, gjilpëra, sensorë dhe aparate për matjen e sheqerit në gjak në afatin e premtuar, ata paralajmërojnë se do të ngrisin padi ndaj Ministrisë së shëndetësisë.
Ata edhe pse kishin një takim me ministrin e shëndetësisë, Fatmir Mexhiti dhe iu premtua zgjidhje, ata thonë se nuk e kanë marrë këtë dhe se do të ndërmarrin hapin e ngritjes së padisë, por nga ministria nënvizojnë se paditë nuk janë zgjidhje.
“Ministria e Shëndetësisë i kupton plotësisht Shoqatat e Diabeteve me të cilat është në kontakt të vazhdueshëm. Ne jemi absolutisht në të njëjtën anë në këtë rast dhe po bëjmë të gjitha përpjekjet për të korrigjuar gabimet e udhëheqjes së mëparshme të Ministrisë së Shëndetësisë, e cila ka vonuar të gjitha procedurat dhe nuk ka ndjekur rekomandimet e Komisionit për fillimin e procedurave në në kohën e duhur. Ministri Dr. Fatmir Mexhiti që nga dita e parë ka qenë në komunikim me shoqatat dhe pacientët dhe në mënyrë transparente ka treguar problemet e trashëguara dhe arsyet e zgjatjes së blerjeve. Duke filluar nga java e ardhshme shoqatat do të thirren sërish në mbledhje dhe sërish bashkërisht do të diskutohet për situatën dhe do të njoftohen për procedurat që po vijojnë në këto momente për prokurimin e terapisë së nevojshme. Paditë nuk janë zgjidhje dhe as nuk ka nevojë sepse ministria është partnere me shoqatat, por nëse tashmë kanë vendosur të padisë, duhet të drejtohet te lidershipi i mëparshëm që krijoi problemet që ministria po përpiqet të bëjë. tejkaluar sot”, theksuan nga Ministria e shëndetësisë.
Nga aty apelojnë për përmbajtje dhe mirëkuptim, sepse po bëhet absolutisht gjithçka që është në kompetencë të ministrisë, duke respektuar procedurat ligjore dhe afatet nuk mund të shmangen.
Ministria e Shëndetësisë kishte premtuar më herët se diabetikët do të marrin terapinë e nevojshme deri në fund të korrikut, por kjo nuk ndodhi.
