Udhëheqësit e NATO-s do të duhet të miratojnë mijëra faqe planesh sekrete ushtarake që do të përshkruajnë se si do të përgjigjet pakti në rast të një sulmi rus, raporton Reuters, përcjellë GazetaBlic.
Kjo lëvizje përfaqëson një ndryshim të madh në Aleancën e Atlantikut të Veriut, pasi ajo nuk ka bërë plane të mëdha mbrojtëse për një kohë të gjatë – në të kaluarën e afërt ka marrë pjesë në luftërat në Afganistan dhe Irak, si dhe në bombardimet e ish-Jugosllavisë, por ajo nuk e konsideronte Rusinë post-sovjetike një kërcënim ekzistencial.
Megjithatë, me fillimin e Operacionit Special Ushtarak Rus në Ukrainë, konflikti i parë ushtarak në tokën evropiane që nga Lufta e Dytë Botërore, siç raportohet nga Reuters, “gjithçka ka ndryshuar – NATO dëshiron të ketë një përgjigje e gatshme në rast sulmi nga ndonjë armik”, dhe mbi të gjitha nga ana e Moskës.
“Dallimi thelbësor midis menaxhimit të krizave dhe mbrojtjes kolektive është ky: sekuenca e ngjarjeve nuk përcaktohet nga ne, por nga kundërshtari ynë,” tha zyrtari i lartë i Aleancës, Admirali Rob Bauer, duke shtuar se ata duhet të përgatiten për faktin që mund të lindë një konflikt ne çdo kohë.
NATO do të ofrojë gjithashtu udhëzime për shtetet anëtare se si të përmirësojnë forcat dhe logjistikën e tyre.
“Aleatët do të dinë saktësisht se cilat forca dhe aftësi u nevojiten, duke përfshirë ku, çfarë dhe si t’i vendosin ato,” tha shefi i NATO-s Jens Stoltenberg për dokumentet top-sekret, të cilat, si në Luftën e Ftohtë, do të parashikojnë shpërndarjen e trupave të caktuara për të mbrojtur një rajon të caktuar.
Reuters thekson se kjo është një vazhdimësi e vendosjes së trupave luftarake të Aleancës në lindje të Kontinentit të Vjetër, të udhëhequra nga Britania e Madhe, Kanadaja dhe Gjermania, vendosje e cila filloi në vitin 2014. Megjithatë, thekson agjencia britanike e lajmeve, Aleanca përballet me një detyrë të madhe – në vitin 2022, ajo ra dakord të vendosë 300,000 ushtarë në gatishmëri të lartë, krahasuar me 40,000 në të kaluarën.
Por luftimet në Ukrainë kanë ekspozuar mungesën e kapacitetit të anëtarëve të NATO-s për të prodhuar sasi të mjaftueshme armësh dhe municionesh, dhe është lënë pas dore edhe logjistika prej kohësh e nevojshme për dislokimin e shpejtë të trupave me hekurudhë ose rrugë, e cila tani duhet të përmirësohet.
Për të financuar planet e reja, Stoltenberg u bëri thirrje anëtarëve që t’i japin më shumë para NATO-s. Para së gjithash, duke përmbushur detyrimet e tyre financiare ndaj NATO-s (dy për qind të bruto prodhimit të brendshëm secili), por edhe duke rritur shpenzimet për qëllimet e Aleancës, që do të jetë edhe tema e samitit në kryeqytetin lituanez.
Zyrtarët e NATO-s vlerësojnë se zbatimi i plotë i planeve të reja do të zgjasë disa vite, përcjellë GazetaBlic.
