Në Bursa të Turqisë, është hapur ekspozita me fotografi të masakrave dhe zhvarrimeve të personave të zhdukur me dhunë gjatë luftës së në Kosovë.
Hapja e kësaj ekspozite është bërë e mundur falë organizimit të OJQ “For New Life Kosovo” në bashkëpunim me Qendrën Kulturore të Kosovës në Bursa, e mbështetur nga Ministria e Punëve të Jashtme dhe Diasporës dhe Komisioni Qeveritar për Persona të Zhdukur.
Në hapje të kësaj ekspozite me fjalë rasti u paraqitën Kumrije Karaqica, përfaqësuese e familjeve të personave të zhdukur në Kosovë si dhe Recep Gunduz nga Qendra Kulturore e Kosovës në Bursa.
Karaqica në fjalën e saj ka thënë se si pasojë e luftës në Kosovë në vitet 1998-99, ende figurojnë të zhdukur edhe 1617 persona, ndwrsa numri i personave të zhdukur pas ndërprerjes së veprimeve ushtarako-policore ka qenë 6057 persona.
Sipas saj më shumë se 2800 mbetje mortore të identifikuara u janë kthyer familjareve për rivarrim, disa nga rastet janë lajmëruar të gjallë pasi kanë qenë në burgjet e Serbisë dhe një numër i rasteve, rreth 200 janë mbyllur për arsye administrative.
Në territorin e Kosovës që nga paslufta janë gjurmuar e gërmuar me qindra lokacione në të gjitha komunat e vendit ku çdo vit është punuar në më shumë se 20 lokacione. Kane rezultuar si varreza masive nw Izbicë, Korishë ,Suhedollë, Kaçanik e shumë varreza masive në të gjitha komunat e Kosovës.
“Ka edhe lokacione të përbashkëta me Komisionin e Serbisë dhe janë të pranishëm edhe pala e Beogradit. Mbetjet mortore të 955 personave u janë rikthyer për rivarrim familjve të tyre. Vetëm, në Batajnicë janë gjetur 747 mbetje mortore në vitet 2001-2002 “ ka thënë ndër të tjera Karaqica.
Ekzpozita do të jetë e hapur deri më 19 janar, ndërsa për çështjen e personave të zhdukur do të mbahet edhe një diskutim me organizatat e qytetit .
