Deputetja e Aleancës për Shqiptarët, Ilire Dauti ka dhënë dorëheqje nga funksioni koordinatore e Grupit Parlamentar të Aleancës për Shqiptarët, përcjell TV21. Dauti thotë se dorëheqja e saj vjen si pasojë e rezultatit nga zgjedhjet lokale në Tetovë.
“Por, rezultati në zgjedhjet e fundit lokale e edhe me shumë rezultati tejet i dobët për Këshillin e Tetovës më goditi edhe mua, e ndërgjegja ime si deputete e zonës gjashtë nuk e tejkalon e s’mund të jem indiferente. Prandaj ju njoftoj që sapo u dorëhoqa nga Koordinatore e Grupit Parlamentar të Aleances për Shqiptarët, të vetmin emrim që kam për momentin nga subjekti politik”, ka shkruar Dauti.
Në vijim shkrimi i plotë i deputetes:
Të nderuar qytetarë
Të japim mund në çfarëdo forme, t’i shërbejmë kombit e ta perkthejmë atë në një të drejtë më shumë, gjer në barazi të plotë në raport me çdo kend që na trajton si fërtele në kushtetutë e jetë, është detyrë e secilit nga ne.
Çdo rezultat në këtë drejtim është e tëra që ju duhet njerëzve të thjesht, krenar e me dinjitet cilësi të cilat vlerësohen reciprokisht mes njerëzish që besojnë në të njëjtat parime.
Nisur nga këtu mbështetja e juaj në zgjedhjet e fundit parlamentare i dha kuptim e hije fjalës time në Kuvend e do jetë kuptimi i asaj fjale gjer në fund të mandatit si deputete e Aleances për Shqiptarët në Kuvendin e Maqedonisë së Veriut.
Por, rezultati në zgjedhjet e fundit lokale e edhe me shumë rezultati tejet i dobët për Këshillin e Tetovës më goditi edhe mua, e ndërgjegja ime si deputete e zonës gjashtë nuk e tejkalon e s’mund të jem indiferente. Prandaj ju njoftoj që sapo u dorëhoqa nga Koordinatore e Grupit Parlamentar të Aleances për Shqiptarët, të vetmin emrim që kam për momentin nga subjekti politik.
E juve që besuat në mua vazhdimisht, dua t’ju them faleminderit nga zemra, po mundët vazhdoni të besoni sepse unë besoj fortë në ju.
Njerëzisht Ilire Dauti
