Udhëheqësi i grupit terrorist Ismail Haniyeh tha se është “afër arritjes së një marrëveshjeje armëpushimi” me Izraelin edhe pse sulmi i përgjakshëm në enklavën e shkatërruar nga lufta, vazhdon.
Deklarata ngjalli shpresa për fatin e pengjeve izraelitë të mbajtur nga Hamasi në masakrën e 7 Tetorit, shkruan The Sun.
Gjithsej 240 pengje mbahen në Gaza, duke përfshirë të paktën 30 fëmijë, sipas ambasadës izraelite.
Ndërsa udhëheqësi i grupit nuk dha më shumë informacion, një zyrtar i Hamasit dha disa detaje në lidhje me negociatat për Al Jazeera TV.
Issat el Reshiq shpjegoi se negociatat u fokusuan në faktin se sa do të zgjaste armëpushimi, marrëveshjet për dërgimin e ndihmave në Gaza dhe shkëmbimin e pengjeve izraelitë të mbajtur nga Hamasi për të burgosurit palestinezë në Izrael.
Të dyja palët do të lirojnë gratë dhe fëmijët dhe detajet do të shpallen nga Katari, i cili është duke ndërmjetësuar në negociata, tha ai.
Burime nga Hamasi dhe Xhihadi Islamik konfirmuan gjithashtu se grupet e tyre kishin rënë dakord me kushtet e një marrëveshjeje armëpushimi.
Marrëveshja përfshin një armëpushim pesë-ditor, i përbërë nga një armëpushim në terren dhe kufizime për operacionet ajrore izraelite mbi Gazën jugore. Sipas marrëveshjes midis 50 dhe 100 pengjeve civilë dhe të huaj izraelitë do të lirohen, duke përjashtuar personelin ushtarak. Në këmbim, rreth 300 palestinezë do të liroheshin nga burgjet izraelite, mes tyre gra dhe fëmijë. Marrëveshja do të lejojë gjithashtu deri në 300 kamionë me ushqime dhe ndihma mjekësore të hyjnë në Gaza.
Bisedimet për një marrëveshje kanë vazhduar për javë të tëra.
Të hënën, presidenti i SHBA Joe Biden tha se ai besonte se një marrëveshje ishte afër ndërsa shpresat u rritën për bisedimet e ndërmjetësuara nga Katari.
Komiteti Ndërkombëtar i Kryqit të Kuq tha të hënën se presidenti i tij kishte udhëtuar në Katar për të takuar Haniyeh të Hamasit.
Dhe të dielën, ambasadori i Izraelit në SHBA, Michael Herzog tha se shpresonte se një marrëveshje do të arrihej në ditët në vijim.
Ndërsa zyrtari i lartë i Shtëpisë së Bardhë, Jonathan Finer tha se ai besonte se “shumica dërrmuese” e pengjeve ishin “me shumë gjasa” gjallë, duke shtuar se negociatat kishin arritur në një “fazë të ndjeshme”.
Nëse ajo shkon përpara, marrëveshja do të ishte pauza e parë në konflikt, që nga sulmet e 7 tetorit që morën 1200 jetë.
Si hakmarrje, Izraeli nisi një ofensivë në zgjerim tokësor dhe ka bombarduar Gazën për gjashtë javët e fundit.
Pjesë të mëdha të Gazës janë shkatërruar nga sulmet ajrore që kanë arritur në mijëra, dhe territori është nën rrethim, me ushqim, ujë dhe karburant minimal të lejuar për të hyrë.
Qeveria e Gazës, e drejtuar nga Hamasi, pretendon se të paktën 13,300 palestinezë janë vrarë, duke përfshirë mbi 5,500 fëmijë dhe 3,500 gra – megjithëse këto shifra mbeten të paverifikuara dhe kontestohen nga Izraeli.
Izraeli ka argumentuar se forcat e tij po synojnë “infrastrukturën terroriste”, ndërsa Hamasi mohon përdorimin e objekteve mjekësore të Gazës për mbulim. Izraeli ka pretenduar se Hamasi po përpiqet të përdorë civilët e pafajshëm si “mburoja njerëzore”. Kryqi i Kuq vlerëson se rreth 1.5 milionë civilë janë detyruar të largohen nga jugu në mes të sulmit të Izraelit nga toka, ajri dhe deti.
Izraeli është zotuar se do të vazhdojë me ofensivën e tij, duke u zotuar të shtypë Hamasin dhe të sigurojë lirimin e pengjeve.
“Ne nuk do të ndalojmë së luftuari derisa të sjellim pengjet në shtëpi”, deklaroi kryeministri Benjamin Netanyahu pas takimit me të afërmit e të rrëmbyerve.
Pamjet tronditëse të kamerave të sigurisë që tregojnë terroristët e Hamasit duke tërhequr pengje në spitalin al-Shifa janë shfaqur ndërsa një grua shtatzënë ka lindur në robëri.
Ndërkohë, 28 foshnja janë shpëtuar nga al-Shifa dhe janë transportuar mbi kufirin Rafah për të sigurt në Egjipt.
