Juventusi është ende një kantier i hapur, teksa Giuntoli po punon për të formuar një skuadër konkurruese në dispozicion të trajnerit Thiago Motta. Në pritje për t’u zgjidhur e ardhmja e Federico Chiesës, i cili me gjasë do të largohet nga Torino, drejtuesi i klubit bardhezi vijon të punojë për të afruar një sulmues krahu, por edhe një qendërsulmues.
Kjo pasi Milik po vuan dëmtime të shpeshta dhe Vlahovic nuk mund të mbajë i vetëm peshën e repartit të avancuar, teksa media pranë klubit bardhezi kanë nxjerrë emrin e sulmuesit kuqezi Armando Broja, si një alternativë për t’u afruar te Juventusi.
Sipas tyre bëhet me dije se Giuntoli ka kontaktuar drejtuesit e Chelsea-t për t’u konfirmuar vullnetin e Juventusit për të marrë sulmuesin shqiptar në huazim me të drejtë blerjeje verën e ardhshme, opsion ky që nuk preferohet fort nga londinezët, që duan ta shesin njëherë e mirë Brojën.
