Sipas analizës së parë statistikore të pavarur, rreth 47,000 rusë kanë vdekur në luftën në Ukrainë, që nga fillimi i saj në shkurt të vitit 2022. Agjencia e lajmeve Assocciated Press raporton se mediat ruse Mediazona dhe Meduza, në bashkëpunim me një hulumtues të të dhënave nga Universiteti Tubingen të Gjermanisë, studiuan regjistrin e vdekshmërinë për të vlerësuar numrin e vdekjeve shtesë te burrat nën 50 vjeç midis muajit shkurt të vitit 2022 dhe majit të vitit 2023, krahasuar me vitet paraprake. Ata shqyrtuan të dhënat e trashëgimisë dhe të dhënat zyrtare të vdekshmërisë për të hedhur dritë mbi koston e vërtetë njerëzore të pushtimit rus të Ukrainës. Si Moska, ashtu edhe Kievi, nuk japin të dhëna në kohë për humbjet ushtarake dhe përpiqen të minimizojnë viktimat e palës tjetër. Qeveria ruse ka pranuar zyrtarisht vdekjen e pak më shumë se 6,000 ushtarëve, por raportet për humbjet ushtarake janë manipuluar në mediat ruse. Pavarësisht sfidave, Mediazona, Shërbimi Rus i BBC-së dhe një rrjet vullnetarësh kanë ndërtuar një bazë të dhënash të vdekjeve të konfirmuara të luftës duke përdorur postime në mediat sociale dhe fotografi të varrezave në të gjithë Rusinë. Që nga 7 korriku, ata kishin identifikuar 27,423 ushtarë rusë të vrarë. Për të arritur një raport më të plotë, Mediazona dhe Meduza morën të dhënat e rasteve të trashëgimisë të depozituara pranë autoriteteve ruse.
