“Unë jam kundër që Maqedonia të përkufizohet si shtet binacional. Gjuha zyrtare është maqedonishtja dhe ka arsye pse është përcaktuar pragu prej 20 për qind gjatë Marrëveshjes kornizë“, theksoi sot lideri i VMRO-DPMNE-së, Hristijan Mickoski.
I pyetur për të komentuar pretendimin e liderit të Aleancës Arben Taravari se gjatë bisedimeve të tyre, Mickoski ka pranuar që përkufizimi 20 për qind të zëvendësohet me gjuhën shqipe në Kushtetutë, kreu i VMRO-DPMNE tha se i mohon pretendimet e tilla.
“Unë e përgënjeshtroj Taravarin. Ne nuk e kemi diskutuar këtë temë, pra e kemi diskutuar si pjesë e disa temave. Ne folëm për Badenterin. Deri kur do të jetojmë në një shoqëri ku pakica do të sundojë shumicën? Ne kemi diskutuar më tej rregullin e balancuesit. Ishte një bisedë më e gjerë për shumë tema. Deri kur etnia do të jetë profesion. A duam një shoqëri ku cilësia vlerësohet? Le të flasim për një shoqëri ku njerëzit do të gjejnë punë sepse janë cilësorë, jo sepse janë pjesë e një lloj balancuesi. Nëse dikush dëshiron që ne të vazhdojmë të jetojmë në një aparteid ku zhgënjimi i komunitetit shumicë do të jetë gjithnjë e më i madh, nuk mund ta diskutoj këtë”, tha Mickoski.
Siç shtoi ai termi “20 për qind” në Kushtetutë, u lejon komuniteteve të tjera në Maqedoni të përdorin gjuhën e tyre në komunat ku tejkalojnë 20 për qind, siç janë komunitetet boshnjake, serbe, turke dhe rome.(INA)
