Grupi parlamentar i Partisë Demokratike të Kosovës ka propozuar sot themelimin e një Komisioni hetimor parlamentar për zhdukjen e mostrave të Astrit Deharit dhe zjarrin në IML.
Shefi i Grupit Parlamentar i PDK-së, Abelard Tahiri ka thënë se hetimi parlamentar është i domosdoshëm sepse humbën provat e vdekjes së Astrit Deharit.
“Në emër të grupit parlamentar të PDK-së, propozova themelimin e një komisioni hetimor parlamentar për zhdukjen e mostrave të Astrit Deharit dhe zjarret e mistershme në Institutin e Mjekësisë Ligjore.
Hetimi parlamentar është i domosdoshëm sepse humbën provat e vdekjes së Astrit Deharit dhe disa herë flakët e kapluan ndërtesën e Institutit, i cili është nën menaxhimin e drejtpërdrejt të Ministrisë së Drejtësisë”, shkruan ai.
Ndryshe, më 8 dhjetor 2022 ministrja e Drejtësisë, Albulena Haxhiu, kishte njoftuar për zhdukjen e mostrave të Astrit Deharit nga laboratori në Institutin e Mjekësisë Ligjore (IML).
Në një konferencë të jashtëzakonshme për media, Haxhiu këtë akt e kishte quajtur të rëndë dhe kriminal.
Ndërkaq, brenda tetë muaj objekti i IML u përfshi dy herë nga flaktë. Herën e fundit, para disa dite u dogjën dy zyra të këtij instituti.
