Përdhunuan të mitura dhe gra gjatë luftës, dënohen 40 vjet më vonë 10 ushtarë peruanë

Dhjetë ushtarë peruanë në pension janë dënuar me nga gjashtë deri në 12 vjet burg për krime kundër njerëzimit, pasi u shpallën fajtorë për përdhunimin sistematik të nëntë grave, disa prej tyre të mitura, midis viteve 1984 dhe 1985, gjatë konfliktit të armatosur të brendshëm kundër lëvizjes guerile maoiste Sendero Luminoso.

Ky vendim i jep fund pesë viteve procedime në një çështje që është bërë emblematike në Peru, duke qenë e para që gjykon dhunën seksuale të kryer nga ushtarët.

Asnjë nga dhjetë të dënuarit, të përfaqësuar nga avokatët e tyre, nuk ishin të pranishëm në leximin e dënimit. Tre ushtarë të tjerë u dënuan në mungesë.

Përdhunimet sistematike filluan në vitin 1984, kur ushtria peruane krijoi një bazë pranë qyteteve Ande të Manta dhe Vilca, në rajonin jugor të Huancavelica, një nga më të varfrit e Perusë. Disa nga viktimat ishin të mitura dhe pesë prej tyre mbetën shtatzënë, kujtojnë avokatët e tyre.