Është irracionale të merret peng e ardhmja e vendit me synimin përfundimtar ardhjen në pushtet, ndryshimet kushtetuese janë të detyrueshme, vlerëson Ivo Rangjelloviq, master i politikave kooperative dhe demokraci në Londër (University College London).
“Nuk mendoj se themeli i kushtëzimit të ndryshimeve kushtetuese qëndron në një lloj gjeo-strategjie. Bëhet fjalë për interesa partiake që e lënë në hije shtetin, pra prioritetet strategjike. Çdo parti në opozitë, që kundërshton ndryshimet kushtetuese, duhet t’i votojë ato sapo të vijë në pushtet. Ndaj është irracionale të vihet peng e ardhmja e vendit, me synimin përfundimtar ardhjen në pushtet. Pas pranimit të propozimit francez, është politikisht e parëndësishme nëse ndryshimet kushtetuese janë të sakta apo jo, sepse janë të detyrueshme”, deklaroi Rangjeloviq për Indeks.mk
Njohës të rrethanave politike në vend thonë se kushtëzimi me zgjedhje të parakohshme i ndryshimeve kushtetuese nga Lëvizjes BESA vetëm se e de-faktorizon këtë subjekt politik te shqiptarët, ndërkohë që e rreshton me forcat regresive anti-perëndimore. Përveç kushtëzimeve të Lëvizjes Besa dhe Bilall Kasamit, kundër ndryshimeve kushtetuese është edhe Levica dhe Dimitar Apasievi.
Opozitarja VMRO-DPMNE edhe pse kërkon zgjedhje të parakohshme parlamentare, megjithatë taktizon në qëndrimin e saj për sa i përket ndryshimeve kushtetuese. Nga kjo parti kërkojnë garanci ndërkombëtare se futja e bullgarëve në preambulën e kushtetutës do të jetë kërkesa e fundit e Bullgarisë, ndërkohë që ekspertët thonë se kjo garanci vetëm se është e apostrofuar në protokollin francez.
Opozitarja Aleanca për Shqiptarët është deklaruar tanimë se do t’i mbështesë ndryshimet e nevojshme kushtetuese, pa asnjë kusht, që vendi të ecë përpara në rrugëtimin e tij euro-integrues.
Në anën tjetër, dy partitë më të mëdha në pushtet LSDM-BDI dhe partnerët tjerë të koalicionit qeveritar, thonë se rrugëtimi euro-integrues i vendit është i pandalshëm, ndërsa zgjedhje parlamentare do të ketë në afatin e rregullt në vitin 2024.
Edhe kryeministri Dimitar Kovaçevski, edhe kreu i BDI-së, Ali Ahmeti, përsërisin se zgjedhjet do të mbahen në afatin e rregullt në vitin 2024. Qeveria thotë se është e nevojshme që të 120 deputetët të votojnë ndryshimet e Kushtetutës dhe për këtë pritet të fillojnë konsultimet formale në Parlament në ditët në vijim, me liderë politikë, ekspertë, organizata joqeveritare etj. (Indeks.mk)
