Administrata gjyqësore proteston sot nga gjykata penale drejt qeverisë, ku do të insistojnë për takim me kryeministrin, transmeton Portalb.mk..
Ata do të kërkojnë kthimin e shtesave prej 35 për qind që nuk i kanë marrë që nga marsi i këtij viti, por edhe rritje të pagave siç morën funksionarët.
Diferenca e pagës midis një nëpunësi gjykate kundrejt një gjyqtari thuhet të jetë 1:6.
Ministria e Financave vë në pikëpyetje pavarësinë e gjyqësorit.
Me një vërejtje të tillë, Këshilli buxhetor gjyqësor i bëri thirrje ministrisë resore që urgjentisht të zgjidhë problemin dhe t’u paguajë kompensimet e parashikuara me ligj zyrtarëve gjyqësorë.
Më 3 shtator, në një mbledhje, qeveria mori vendim që në shtatë ditët e ardhshme të formohet një grup pune, i cili do të punojë për gjetjen e një zgjidhjeje në lidhje me kërkesat dhe situatat e parashtruara nga gjykata, prokuroria publike dhe punonjësit e organet e administratës shtetërore.
Ky vendim është propozim i Ministrisë së Drejtësisë, pasi ministri Krenar Lloga në bisedime me Sindikatat e SPAAGjSh-it janë pajtuar që të gjendet një zgjidhje e përbashkët, në mënyrë që të mos pengohet procesi i zhvendosjes së lëndëve në gjykata dhe prokurori publike.
Në grupin e punës do të jenë ministrat e drejtësisë, financave dhe shoqërisë së informacionit dhe administratës, zëvendëskryeministri përgjegjës për çështjet ekonomike, koordinimin e dikastereve ekonomike dhe investimeve, si dhe përfaqësues nga Sindikata e SPAAGjSh-it.
Megjithatë asgjë deri më tani nuk ka dalë në dritë nga ky grup pune.
