Rusia dhe Kina do të zhvillojnë stërvitje të përbashkëta detare midis 21 dhe 27 dhjetorit, ka thënë ministria ruse e mbrojtjes, prëcjell Bot sot.
Stërvitjet e përbashkëta detare, të cilat zhvillohen çdo vit që nga viti 2012, do të përfshijnë gjuajtje me raketa dhe artileri në Detin e Kinës Lindore.
Ministria shtoi se qëllimi kryesor i stërvitjeve është “forcimi i bashkëpunimit detar midis Rusisë dhe Kinës dhe ruajtja e paqes dhe stabilitetit në rajonin Azi-Paqësor”.
Që kur Rusia pushtoi Ukrainën, Moska ka kërkuar të rrisë lidhjet e saj politike, të sigurisë dhe ekonomike me Pekinin dhe e sheh udhëheqësin e Kinës Xi Jinping si një aleat kyç në një aleancë anti-perëndimore.
Të dy vendet nënshkruan një partneritet strategjik “pa kufij” vetëm disa ditë përpara se Moska të niste pushtimin e saj, por Pekini që atëherë ka shprehur shqetësime për veprimet e Rusisë në Ukrainë.
Rusia tha se katër nga anijet e saj do të merrnin pjesë në stërvitje – duke përfshirë kryqëzorin me raketa Varyag – ndërsa gjashtë anije kineze do të merrnin pjesë, së bashku me avionë dhe helikopterë nga të dyja palët.
Anijet ruse u nisën të hënën nga porti i Lindjes së Largët të Vladivostok për të marrë pjesë në stërvitjet njëjavore, të cilat fillojnë të mërkurën.
