Presidenti Stevo Pendarovski sot realizoi takim me presidentin e Republikës së Kroacisë, Zoran Milanoviq, i cili është për vizitë në Republikën e Maqedonisë së Veriut me rastin e pjesëmarrjes në takimin joformal të liderëve të aleatëve të NATO-s nga rajoni, që mbahet në Shkup.
Në takim, siç kumtoi kabineti i Pendarovskit, janë shkëmbyer mendime për marrëdhëniet e përgjithshme ndërmjet dy vendeve, bashkëpunimin në nivel rajonal dhe multilateral, për perspektivat evropiane të vendit tonë dhe situatën në rajonin e Ballkanit Perëndimor.
Në këtë drejtim, u shkëmbyen informacione për çështjet e sigurisë në një kontekst më të gjerë, si dhe për agresionin ushtarak rus kundër Ukrainës dhe aktivitetet në rajon.
Të dy bashkëbiseduesit e konfirmuan përkushtimin e tyre për thellimin e miqësisë tradicionale dhe forcimin e bashkëpunimit rajonal dhe shprehën gatishmërinë për të vazhduar bashkëpunimin konstruktiv në kuadër të NATO-s.
Presidenti Pendarovski falënderoi Kroacinë për mbështetjen parimore për integrimet evropiane të Maqedonisë.
