Ambasadori amerikan në Kosovë, Jeffrey Hovenier, ka publikuar një video-mesazh në prag të Vitit të Ri, gjersa ka folur për arritjet, vështirësitë, dialogun Kosovë-Serbi, luftën në Ukrainë.
Hovenier thekson se gjatë vitit 2023 ka pasur momente të vështira, por që ka pasur edhe arritje e shumë përparim, për të cilat tha se duhet festuar.
Ambasadori amerikan ka thënë se Shtetet e Bashkuara të Amerikës janë të përkushtuara si më parë për partneritet me popullin e Kosovës, teksa tha se me Qeverinë e Kosovës kanë shtyrë përpara qëllimet kryesore.
“Shtetet e Bashkuara të Amerikës janë po aq të përkushtuara si edhe më parë për partneritetin tonë me popullin e Kosovës”, u shpreh Hovenier.
Ambasadori amerikan u ndal edhe te dialogu Kosovë-Serbi si një prej çështjeve që ka marrë shumë kohë dhe energji.
Ai ka thënë se SHBA pret përparim të njëmend gjatë vitit 2024, duke kërkuar nga Kosova dhe Serbia që të përmbushin obligimet që dalin nga Marrëveshja e Ohrit dhe gjithashtu ka kërkuar nga Kosova që të themelojë Asociacionin e Komunave me Shumicë Serbe.
Hovenier ka thënë se procesi i normalizimit Kosovë-Serbi përmbyllet me njohje reciproke dhe ka thënë se zbatimi i Marrëveshjes së Ohrit dhe Aneksit të Implementimit është hap i madh drejt këtij synimi.
