Gjykata Penale në Tetovë ka vazhduar për 30 ditë masën e paraburgimit ndaj mjekut anesteziolog 43 vjeç nga Tetova, me iniciale A.D., shkruan TV21. I njëjti gjendet në paraburgim pasi transmetoi “live” në “TikTok” pamje nga reparti i Gjinekologjisë në Spitalin e Tetovës. Mjeku në fjalë u arrestua në fshatin Odër. Ndaj të njëjtit fillimisht ishin shqiptuar 8 ditë paraburgim, ndërsa tashmë personi në fjalë është përzënë nga puna në këtë spital, kurse Oda e Mjekëve pritet t’i merr licencën për 7 vjet.
Prokuroria Themelore ka ngritur dy aktakuza, e para për “punë të pandërgjegjshme” dhe e dyta për “incizim të pa autorizuar”. Sipas Kodit Penal personi zyrtar për punë të pandërgjegjshme rrezikon burg nga 3 muaj deri në 5 vjet, ndërsa për veprën incizim i pa autorizuar nga personi zyrtar parashihen të paktën 3 vjet burg.
