Policia e Tiranës ka reaguar publikisht duke dhënë detaje për dy punonjësit e policisë, të arrestuar për grabitje me dhunë pranë zonës së Liqenit Artificial në Tiranë.
Sipas njoftimit, Serxhio Cani dhe Saimir Muzikanti duke shpërdoruar detyrën u kanë marrë paratë me dhunë dy qytetarëve, ndërsa kanë qenë këta të fundit që kanë bërë kallëzimin në polici.
Njoftimi i policisë:
Specialistët për Hetimin e Krimeve të Komisariatit të Policisë Nr. 1, në bashkëpunim me specialistët e Drejtorisë Rajonale të AMP-së, ndaluan shtetasit:
– S. M., 39 vjeç, me detyrë punonjës i Policisë Bashkiake dhe S. C., 22 vjeç, me detyrë punonjës i Patrullës së Përgjithshme të Komisariatit të Policisë Nr. 1, të dy shtetasit banues në Tiranë.
Këta shtetas dyshohet se duke shpërdoruar detyrën, i kanë marrë me forcë, një shumë parash, shtetasve F. V., dhe F. D., në zonën e liqenit artificial, të cilët kanë depozituar kallëzim në Komisariat.
Pas punës hetimore të kryer është bërë e mundur dhe zbardhja e ngjarjes dhe vënia në pranga e 2 shtetasve të mësipërm.
