Zbardhet ngjarja e rëndë e ndodhur mëngjesin e djeshëm në fshatin Selenicë të Vlorës, ku një 56-vjeçar mbeti i vdekur si pasojë e një shpërthimi jashtë banesës së tij.
Fillimisht u raportua se viktimat, Dyrmish Glluçaj humbi jetën aksidentalisht si pasojë e një shpërthimi brenda banesës së tij. Më pas u spekulua se ishte një granatë dore shkaku që ia mori jetën 56-vjeçarit, ndërsa sipas pistave të fundit u tha se Glluçaj humbi jetën pas një shpërthimi të bombolës së sobës, jashtë shtëpisë së tij.
Policia ka zbardhur më në fund ngjarjen, ku zbuloi se nuk ishte aksidentale por qëllimshme. “Bazuar në provat e sigurisë dhe në veprimet e kryera nga specialistët për Hetimin e Krimeve të Rënda në DVP Vlorë, në drejtimin e Prokurorisë, rezultoi se ngjarja nuk ishte aksidentale, por e qëllimshme”, thuhet në njoftimin e policisë .
Shërbimet e policisë zbuluan një lëndë plasëse në sobën me gaz, e fshehur nga i biri , 23-vjeçari Mato Glluçaj.
Dyshohet se i riu e ka kryer këtë akt për shkak të dhunës që ka ushtruar ndaj tij.
Policia ka vënë në pranga të riun ndërsa ka sekuestruar mekanizmin elektrik me të cilin është realizuar shpërthimi. Por gjithashtu janë sekuestruar granata dore, tritol armë e thika, duke qenë që Mato Glluçaj e kishte mirëmenduar planin e tij për të vrarë të atin.
Sipas burimeve për Top Channel 56 vjeçari Dyrmish Gëlluçaj ishte babai i katër fëmijëve, një djalë dhe tre vajza. Sipas banorëve të fshatit Gjorm, ai pothuajse ishte i verbër dhe çdo herë e shoqëronte vajza e vogël 7 vjeçe.
Objektet e sekuestruara: mekanizmi elektrik me të cilin është shfaqur granata, 25 granata dore difensive, 37 kallëpe me lëndë plasëse tritol (me peshë 400 gr. secila), 43 kapsolla detonatore, 5 ndezësa granatash, 1 armë zjari pushkë, 1 celular, thika, 310 fishekë luftarakë, 12 krehra për armë zjarri, 2 radio marrëse-dhënëse, kapuça dhe veshje për mbulimin e fytyrës dhe mjeteve për punime elektrike me ngjitje.
