Zëvendëskryeministri i parë, Izet Mexhiti ka premtuar se për 10 ditë do të pastrohet deponia në Nikushtak dhe se pastaj do të mbetet vetëm mirëmbajtja.
“Pak ka pasur vonesë, për shkak se ishin procedurat e ngatërruara me fondet evropiane dhe aty domethënë kanë dështuar për shkak se kanë udhëheq keq. Këto mjete janë ndarë drejtpërdrejt prej buxhetit të Ministrisë së Ambientit Jetësor, për ta mbajtur fjalën. Pastrimi është për 10 ditët e ardhshme. Është rrethuar këtu. Do të merren masat, domethënë edhe mbulohet me dhe dhe mendoj që mandej mbetet vetëm mirëmbajtja”, tha Mexhiti.
Deponia famëkeqe e Nikushtakut, e cila për 24 vite ka qenë burim ndotjeje dhe rreziku për shëndetin e banorëve të komunës së Likovës, është mbyllur përgjithmonë. Lajmin e ka bërë të ditur zëvendëskryeministri Arben Fetai, duke theksuar se ky problem shumëvjeçar tashmë është kapitull i mbyllur.
Kjo deponi ka ndikuar rëndë në mjedis dhe në shëndetin e banorëve të fshatrave Nikushtak, Haraçinë, Grushinë dhe Orllancë. Përveç ndotjes së tokës, ujit dhe ajrit, zjarret e shpeshta që shpërthenin pothuajse çdo javë kanë rrezikuar seriozisht edhe sigurinë e udhëtarëve në rrugën rajonale Likovë-Kumanovë-Shkup, madje duke shkaktuar edhe raste tragjike.
Për dy dekada, pushteti i kaluar i BDI-së nuk ka ndërmarrë hapa konkretë për zgjidhjen e problemit, pavarësisht premtimeve të përsëritura në fushata zgjedhore. Madje, edhe pse kjo parti ka pasur ministër të ambientit jetësor nga kjo zonë, ish-nënkryetarin Sadulla Durakun, asnjë zgjidhje nuk është ofruar për qytetarët.
“Qeveria VLEN për më pak se një vit e ka mbyllur përfundimisht këtë deponi të egër. Ky kapitull i errët tashmë i përket historisë. Zona do të sanohet dhe gjelbërohet, duke u kthyer në harmoni me bukuritë natyrore përreth. Ne jemi këtu për qytetarët dhe për të mirën e tyre”, tha Fetai.
