Gostivar, [17.09.2025] – Organizata e shoqërisë civile “VERDE VITA” me seli në Gostivar, njofton fillimin e projektit të ri me fokus në monitorimin e përdorimit të burimeve administrative gjatë zgjedhjeve lokale 2025 në komunat e Gostivarit dhe Vrapçishtit. Ky projekt synon të forcojë qeverisjen demokratike dhe të promovojë transparencën zgjedhore në këto dy komuna me rëndësi strategjike në rajonin e Pollogut.
Qëllimi kryesor i projektit:
Të kontribuojë në integritetin, drejtësinë dhe transparencën e zgjedhjeve lokale, duke monitoruar dhe dokumentuar çdo keqpërdorim të mundshëm të burimeve publike (p.sh. automjete, ambiente, personel ose asete të tjera shtetërore) nga zyrtarët publikë gjatë periudhës para dhe gjatë zgjedhjeve.
Objektivat specifike:
Të identifikojë dhe dokumentojë rastet e mundshme të keqpërdorimit të burimeve administrative.
Të raportojë me saktësi dhe në kohë të gjitha gjetjet në përputhje me udhëzimet e IFES.
Të angazhojë institucionet lokale, aktorët politikë dhe shoqërinë civile në dialog rreth transparencës dhe ndarjes mes shtetit dhe interesave partiake.
Të rrisë vetëdijen e qytetarëve dhe mediave lokale mbi rreziqet dhe ndikimin e keqpërdorimit të burimeve administrative.
Të ofrojë mësime dhe rekomandime për përmirësimin e praktikave zgjedhore në të ardhmen.
Aktivitetet kryesore të projektit:
Rekrutimi dhe trajnimi i monitoruesve lokalë për të kryer vëzhgime sistematike gjatë periudhës zgjedhore.
Monitorimi i institucioneve publike, ngjarjeve dhe aktiviteteve gjatë periudhës para dhe gjatë fushatës zgjedhore.
Raportimi periodik dhe koordinimi i gjetjeve me IFES.
Takime me përfaqësues të të rinjve nga partitë politike, si dhe shpërndarja e rezultateve përmes mediave lokale dhe rrjeteve sociale.
Përgatitja e një raporti final gjithëpërfshirës me rekomandime për përmirësime sistematike.
Përfituesit:
Projekti do të përfshijë institucionet lokale, partitë politike, shoqërinë civile, mediat dhe qytetarët e komunave të Gostivarit dhe Vrapçishtit (rreth 80,000 banorë dhe 65,000 votues të regjistruar), duke forcuar besimin në proceset demokratike dhe duke nxitur pjesëmarrjen aktive qytetare.
Rëndësia e projektit:
Ky monitorim i bazuar në komunitet synon të parandalojë keqpërdorimet administrative, të promovojë konkurrencën e barabartë në zgjedhje dhe të forcojë institucionet demokratike në nivel lokal.
