Ministria e Brendshme e Kroacisë ka marrë vendim për lehtësimin e procedurave kufitare për udhëtarët që vijnë nga vendet jashtë Bashkimit Europian gjatë sezonit të verës. Nëse koha e pritjes tejkalon 45 minuta, policia do të ketë të drejtë të pezullojë pjesërisht kontrollet strikte biometrike. Ky hap vjen si përgjigje ndaj kolonave të mëdha dhe presionit mbi kalimet kufitare.
Sezoni turistik veror ka sjellë turma të mëdha në kalimet kufitare drejt Kroacisë, ndërsa situata u komplikua edhe më shumë me futjen e sistemit të ri europian EES (Entry/Exit System). Udhëtarët nga rajoni që udhëtojnë drejt bregut të Adriatikut tashmë po përballen me kolona dhe pritje shumëorëshe. Megjithatë, nga Zagrebi vijnë lajme optimiste që mund të lehtësojnë ndjeshëm udhëtimin gjatë muajve të verës, transmeton Pa Censurë.
Ministri kroat i Brendshëm, Davor Bozhinoviç, njoftoi zyrtarisht se në rast të bllokadave të jashtëzakonshme, sistemi strikt EES në kufi do të lehtësohet përkohësisht. Autoritetet sqarojnë se shërbimet kufitare kanë të drejtë ligjore të pezullojnë pjesërisht protokollin nëse vlerësohet se koha e pritjes për hyrje në vend do të tejkalojë **45 minuta.
Lehtësimi i procedurës në praktikë do të thotë se në kalimet kufitare do të vazhdojë krijimi i dosjeve dixhitale për udhëtarët që hyjnë, por prej tyre nuk do të kërkohet të lënë të dhëna të reja biometrike. Kjo nënkupton që në ditët kritike me trafikun më të madh, policia kufitare nuk do të bëjë skanim të fytyrës dhe marrje të gjurmëve të gishtërinjve, gjë që do ta përshpejtojë ndjeshëm rrjedhën e automjeteve, përcjell Pa Censurë.
Nga MPB kroate konfirmuan se ky fleksibilizim i shkurtër dhe i përkohshëm tashmë po përdoret sa herë që ka nevojë reale në terren. Megjithatë, autoritetet theksojnë se ky mekanizëm dixhital është menduar kryesisht për rritjen e sigurisë së qytetarëve në Bashkimin Europian dhe se përmirësimi i tij do të vazhdojë pavarësisht lehtësimit aktual.
Se sistemi i ri tashmë po jep rezultate serioze në kontrollin e kufijve e tregon edhe statistika zyrtare. Me zbatimin efektiv të tij dhe shkëmbimin e shpejtë të informacioneve mes shërbimeve të sigurisë në BE, deri tani rreth 5.000 personave u është refuzuar menjëherë dhe u është parandaluar përpjekja për hyrje ilegale në territorin e Unionit.
