Qarkullimi ajror në Aeroportin ndërkombëtar të Shkupit, gjatë mbajtjes së Këshillit të 30-të ministror të OSBE-së në Shkup, sot, nesër (30 nëntor) dhe pasnesër (1 dhjetor) do të zhvillohet rregullisht, informojnë nga TAV Maqedoni. Edhe nga Navigacioni i Maqedonisë M-NAV, ofruesi kombëtar i shërbimit të navigacionit ajror, nuk pret ndonjë vonesë në linjat ajrore të rregullta apo ato të paralajmëruara shtesë për takimin ministror të OSBE-së.
TAV u bën apel udhëtarëve që të ndjekin udhëzimet dhe njoftimet e Ministrisë së Punëve të Brendshme lidhur me regjimin e qarkullimit nëpër qytet për të mbërritur në kohë në aeroport.
“TAV Maqedoni njofton se qarkullimi ajror në Aeroportin ndërkombëtar të Shkupit në ditët në vijim – 29 nëntor, 30 nëntor dhe 1 dhjetor, gjatë Këshillit të 30-të ministror të OSBE-së në Shkup, do të zhvillohet rregullisht, por në të njëjtën kohë u bën apel udhëtarëve që t’i ndjekin udhëzimet dhe njoftimet e Ministrisë së Punëve të Brendshme lidhur me regjimin e komunikacionit në Qytetin e Shkupit, për të arritur me kohë në fluturimet e tyre, gjegjësisht në aeroport”, thonë nga TAV Maqedoni.
Nga ana tjetër, M-NAV në një deklaratë për MIA-n theksoi se sipas kapaciteteve të publikuara dhe potencialit njerëzor në dispozicion, nuk presin vonesa në linjat e rregullta ajrore apo fluturime të paralajmëruara shtesë lidhur me Takimin ministror të OSBE-së.
“Të gjithë aeroplanët do të shërbehen në mënyrë efikase dhe të sigurt sipas nevojave”, njofton M-NAV
