Nënkryetari i Aleancës për Shqiptarët (ASH), Elmi Aziri në emisionin “10 minuta” në TV21 ka folur se kur kjo parti do të marrë vendimin lidhur me koalicionimin për zgjedhjet e ardhshme.
“Besoj se me ditën e afrimit të zgjedhjeve, datave Aleanca për Shqiptarët do t’i mbledh organet partiake dhe do të merr vendim meritore”, tha Aziri.
Ai ka folur edhe për deklaratën e Bujar Osmanit të BDI-së ku thotë se skena politike në vend ndahet në dy fronte – europiane dhe anti-europiane.
Sipas tij, me deklarata nuk mbahen frontet, por duhet të bazohemi në veprimet e partive politike.
“Me një deklaratë ose dy nuk mbahen frontet, por do të duhet t’i kemi për bazë veprimet të cilat i bëjnë subjektet politke dhe mbi bazën e tyre të bëjmë vlerësimin se kush çfarë orientimi ka. Ne jemi dëshmitarë të veprimeve anti-europiane të dy subjekteve opozitare maqedonase, siç është VMRO-DPMNE-ja dhe “Levica” (E majta)”, tha Aziri.
Ai më tej shtoi se si parti “duhet të tregohemi vigjilent dhe në asnjë mënyrë të mos lejojmë të devijojë rruga europiane e vendit”.
