Nënkryetari i BDI-së, njëherë edhe koordinator i grupit parlamentar të BDI, Arbër Ademi, mbrëmë në “10 Minuta” në TV21 tha se nuk kanë asgjë kundër që opozita shqiptare të ketë anëtarin e saj në KSHZ, por të jetë sipas ligjeve. E për këtë sot pyetëm deputetin e Lëvizjes Besa, Fadil Zendeli, i cili e cilësoi si pozitive deklaratën e Ademit, por tha se nuk pajtohet me deklaratën e Kreut të Kuvendit, Talat Xhaferi, për të cilin Zendeli tha se ka deklaruar se KSHZ mund të funksionojë edhe pa një anëtar.
“Mendoj se është pozitive. Nuk e kam ndjekur, por tash e dëgjoj nga ju… është diçka që është konform asaj që është legjislacioni i vendit, Kodit Zgjedhor që i përcakton ndarjet e vendeve në KSHZ, vendi është vakant për opozitën shqiptare dhe konform kësaj, nëse është një deklaratë e tillë nga ana e koordinatorit të BDI-së, mund ta vlerësoj si pozitive. Por në anën tjetër nuk mund ta llogaris pozitive deklaratën e kryetarit të Kuvendit për TV24 ku thotë se mund të funksionojë KSHZ edhe pa një aëntar për shkak se ka fuqi dhe kompetenca vendimmarrëse”, tha Zendeli për TV21.
