Zëdhënësi i BE-së, Peter Stano ka reaguar sërish lidhur me zhvillimet e fundit politike në Kosovë.
Gjatë një konference, Stano u shpreh se gjatë javës së kaluar kemi parë të paktën dy shembuj të aksioneve që kanë ngritur shqetësimet e BE-së. Njëri ishte rregullorja e BQK-së dhe tjetri ishte operacioni i policisë ndaj disa entiteteve të kontrolluara nga Serbia në veriun e Kosovës.
“Këto veprime nuk i kontribuojnë de-eskalimit të situatës. Ato nuk janë të koordinuar, janë të njëanshme dhe janë ndërmarr pa një nivel të nevojshëm të konsultimeve paraprake me qëllim që të parandalojnë ndikimin negativ që mund të kenë mbi njerëzit në terren”, tha Stano.
Zëdhënësi i BE-së u shpreh se BE-ja ka reaguar ndaj të dyja veprimeve që janë ndërmarrë nga autoritetet e Kosovës, derisa theksoi se hapat e njëanshëm mund të çojnë drejt përshkallëzimi i situatës.
“Pra natyrisht se është shqetësuese të shihet se sekuencimi i hapave të njëanshëm mund të çojë drejt diçkaje që ne nuk duam ta shohim e kjo është përshkallëzimi i situatës në terren sepse një gjë është e qartë: nuk i kontribuon qetësimit të situatës dhe t’i bëjnë njerëzit të ndjejnë se jeta e tyre po përmirësohet. Pra krejt e kundërta. Prandaj kjo është e rëndësishme që të kthehemi tek dialogu i lehtësuar nga BE-ja dhe të angazhohen shumë seriozisht”, tha Stano.
Zëdhënësi i BE-së shtoi se emisari Lajçak po punon me partnerët edhe në rajon edhe në BE që t’iu mundësojë të dyja palëve që të fillojnë të sillen në mënyrë konstruktive dhe t’i kthehen tavolinës së negociatave dhe të diskutojnë çështjet që janë vërtetë të rëndësishme pa bërë hapa të njëanshëm.
Stano shtoi se nuk është i gatshëm të japë një datë se kur pritet të ketë takim të nivelit të lartë në mes kryeministri Albin Kurti e presidentit Aleksandar Vuçiq. /Telegrafi/
