“Këshilli Gjyqësor është një armë e rëndësishme që nevojitet për të transformuar gjyqësorin në Maqedoninë e Veriut, në një institucion që u shërben qytetarëve të saj, që mbron të pafajshmit dhe ndëshkon ata që mendojnë se janë mbi ligjin”. Këtë e tha sot ambasadorja amerikane në Shkup Angela Aggeler, në Konferencën për progresin në zbatimin e rekomandimeve të Misionit vlerësues të BE-së nga Këshilli Gjyqësor i Republikës së Maqedonisë së Veriut.
Aggeler theksoi se Këshilli Gjyqësor duhet të ndjekë rekomandimet e Misionit vlerësues, pasi siç tha, besimi i opinionit tek gjyqësori është tronditës i ulët, përcjell Telegrafi Maqedoni.
“Do të pajtoheni se ka shumë përpara jush. Raporti i Misionit të vlerësimit të BE-së është një udhërrëfyes i vlefshëm për ristrukturimin e Këshillit Gjyqësor dhe rivendosjen e rolit të tij brenda gjyqësorit. Këshilli Gjyqësor është një armë e rëndësishme në arsenalin e armëve që do të jenë të nevojshme për të transformuar realisht gjyqësorin e Maqedonisë së Veriut, në një institucion që u shërben qytetarëve të saj, që mbron të pafajshmit dhe ndëshkon ata që mendojnë se janë mbi ligjin. Sepse sot, siç e përshkroi ambasadori Kopp, besimi i publikut në gjyqësor është tronditës i ulët”, tha Aggeler.
Ajo shtoi se Këshilli Gjyqësor duhet të ndjekë ligjin dhe t’i rezistojë presioneve politike, sepse siç tha, Maqedonia e Veriut ka ligje të mira, si dhe prokurorë dhe gjyqtarë me përvojë.
“Maqedonia e Veriut ka ligje të përpunuara mirë, institucione të pajisura mirë dhe prokurorë dhe gjyqtarë me përvojë, dhe shumica e tyre kanë udhëtuar dhe kanë pasur shkëmbime me Shtetet e Bashkuara. Pra, lind pyetja, si të fillojmë ta plotësojmë atë boshllëk apo mungesë besimi tek ata që supozohet t’u shërbejmë. Mesazhi është i qartë dhe nuk ndryshon. Bëni punën që duhet të bëni. Ndiqni ligjin, punoni për njerëzit, rezistoni presioneve politike, mbroni integritetin tuaj dhe përqafoni transparencën. Puna e vështirë tashmë ka filluar dhe ne po shohim përparim. Tani le t’ju ndihmojmë të ecni edhe më tej në rrugën tuaj”, tha Aggeler./Telegrafi/
