Qyteti i Shkupit do të themelojë Agjencinë e vet për siguri. Pas propozimit të kryetares Danela Arsovska, në seancën e radhës të Këshillit të Qytetit të Shkupit, e cila do të mbahet më 25 korrik, është marrë vendim për themelimin e Shoqërisë me përgjegjësi të kufizuar nga një person (DOOEL) për sigurimin e objekteve në kompetencë të Qytetit të Shkupit, transmeton Portalb.mk.
Agjencia, siç thuhet në sqarim, është themeluar për nevoja të veta, përkatësisht për sigurimin e pronës së Qytetit të Shkupit me depozitë bazë prej 5.000 euro.
“Kompania tregtare do të sigurojë siguri private për shkollat e mesme dhe institucionet kulturore nën autoritetin e Qytetit të Shkupit. Në këtë mënyrë, me një aranzhim të centralizuar, do të arrihet një efikasitet më i madh në sigurimin e ambienteve dhe sigurinë e studentëve dhe punonjësve. Qëllimi i themelimit të Kompanisë Private të Sigurimit është ngritja e standardeve dhe cilësisë së punës për sigurimin e pronës së Qytetit të Shkupit”, thuhet në sqarimin e vendimit për themelimin e Kompanisë së Sigurimit.
Me vite, Qyteti i Shkupit për sigurimin e shkollave, ka punësuar sigurim privat. Sipas marrëveshjes së fundit të lidhur vitin e kaluar në nëntor, për sigurim të një viti të 23 shkollave të mesme, qyteti paguan 160.000 euro.
Me themelimin e Agjencisë për siguri, duke pasur parasysh se nën juridiksionin e Qytetit të Shkupit janë 23 shkolla të mesme dhe disa institucione kulturore, gjegjësisht rreth 30 objekte, do të duhet të punësohen nga 60 deri në 100 persona.
