Sipas të gjitha gjasave, e ardhmja e Thiago Motta-s nuk duhet të vihet në diskutim, të paktën në letër, pasi pasditen e djeshme drejtori sportiv i Juventusit, Cristiano Giuntoli, u përpoq të shuante çdo dyshim.
Megjithatë, sezoni nuk ka përfunduar ende dhe me dy objektiva tashmë të dështuar, është e kuptueshme të mendohet se shumëçka do të varet nga 12 ndeshjet e mbetura.
Madje, edhe një përfundim në vendin e katërt mund të mos mjaftojë.
Sipas Tuttosport, klubi bardhezi pret përmirësime jo vetëm në rezultate, por edhe në sjelljen dhe mentalitetin e skuadrës – dy pika të kritikuara ashpër nga Motta pas eliminimit nga Empoli në Kupën e Italisë.
Po ashtu, pritet edhe një analizë më e thellë e cilësisë së ekipit.
Zërat për një përmbysje në stol
Pavarësisht deklaratave të Giuntoli-t, Tuttosport raporton se ka zëra për një ndarje të mundshme me Motta-n.
Nëse nuk arrihet një marrëveshje mes palëve, shkarkimi i tij me dy vite të mbetura në kontratë do t’i kushtonte Juventusit rreth 20 milionë euro bruto (duke përfshirë edhe stafin e tij).
Por të nisësh sezonin 2025/26 me një trajner që nuk gëzon besim të plotë mund të jetë edhe më e dëmshme.
Katër kandidatë për stolin e Juventusit
Në rast të një ndarjeje, Tuttosport përmend katër emra si pasues të mundshëm të Motta-s:
Antonio Conte – Një rikthim që do të kërkonte një përpjekje të madhe, pasi ai është aktualisht nën kontratë me Aurelio De Laurentiis te Napoli.
Gian Piero Gasperini – Trajneri duket se është në fund të ciklit të tij te Atalanta dhe mund të kërkojë një sfidë të re.
Igor Tudor – Ish-mbrojtësi i Juventusit dhe ish-zëvendëstrajner i Pirlo-s, aktualisht pa kontratë dhe lehtësisht i disponueshëm.
Roberto Mancini – Pas largimit nga Arabia Saudite, ai ka dërguar sinjale për interesimin e tij ndaj disa klubeve që kërkojnë një trajner të ri.
Pavarësisht gjithçkaje, vendimi final do të varet nga mënyra sesi Juventus do ta mbyllë sezonin.
