Deputeti i Vetëvendosjes, Hekuran Murati, ka komentuar zhvillimet rreth vazhdimit të seancës konstituive të Kuvendit të Kosovës, e cila po përballet me mungesë të kuorumit për votimin e Komisionit për votim të fshehtë.
Në një deklaratë për mediat, Murati theksoi se seanca do të vazhdojë aty ku kishte mbetur, ndërsa kritikoi opozitën për, siç u shpreh ai, mungesë reflektimi dhe barrikadim politik.
“Shpresoj dhe uroj si zakonisht që opozita të ketë reflektuar që të zhbllokohet procesi dhe të ecim përpara në zhbllokimin e institucioneve. Ne kemi bërë çmos që ky proces që nga fillimi i seancës konstituive të ofrojë mundësi dhe ide për zgjidhje që të dalim nga ky ngërç, por e kemi parë që reflektimi ka munguar. Tani ka një bllokadë dhe barrikadim te opozita dhe insiston që të ndryshohet kandidati. Pra, që të mos respektohet e drejta kushtetuese e VV-së, në këtë rast si pari fituese e zgjedhjeve. Seanca do të vazhdoj aty ku ka mbetur, aty ku kemi mbetur është mungesa e kuorumit për vendimmarrje për të votuar Komisionin për votim të fshehtë. Është e pamundur që të dilet apo të ndryshohet nga kjo rrjedhë, sepse jemi në një situatë, ku herën e fundit sikur se dy apo tri herët më parë ka mungesë të kuorumit që po duhet të ndërpritet seanca, për shkak të kourumi”, ka thënë Murati.
