Kryetari i Bashkimit Demokratik për Integrim, Ali Ahmeti, ka pritur sot në selinë e BDI-së ish-Presidentin e Republikës së Shqipërisë, Prof. Dr. Rexhep Mejdani, me të cilin ka zhvilluar një takim miqësor dhe ka ndarë një drekë pune.
Në një postim publik, Ahmeti vlerësoi figurën e Mejdanit si një personalitet të shquar të kombit shqiptar, duke theksuar rolin e tij udhëheqës në periudha të vështira për Shqipërinë, si dhe kontributin e tij gjatë luftës në Kosovë dhe në Maqedoninë e Veriut.
Takimi u zhvillua në kuadër të shënimit të 31-vjetorit të Universitetit të Tetovës, me rastin e të cilit Prof. Dr. Rexhep Mejdani u nderua me titullin Doktor Honoris Causa, si vlerësim për kontributin e tij akademik, politik dhe kombëtar.
Sipas Ahmetit, gjatë takimit u shkëmbyen mendime dhe pikëpamje mbi zhvillimet e përgjithshme politike, situatën në Maqedoninë e Veriut, në rajon dhe më gjerë.
“Presidenti Mejdani mbetet një figurë që e nderon kombin tonë dhe një zë i urtë i mendimit akademik e politik shqiptar”, theksoi Ahmeti. (INA)
