Sot, më 23 prill, në mbarë botën shënohet Dita Botërore e Librit dhe e të Drejtave të Autorit, një datë e rëndësishme që synon të nxisë dashurinë për librin, leximin dhe respektimin e të drejtave të autorëve. Kjo ditë shërben si një kujtesë për rolin e pazëvendësueshëm që libri dhe krijuesit kanë në zhvillimin kulturor dhe shoqëror të një vendi.
Ideja për shënimin e kësaj dite e ka origjinën në rajonin e Katalonisë në Spanja, ku ekziston një traditë e bukur: çdo person që blinte një libër, shpërblehej me një trëndafil. Ky simbol i ndërthurjes së dijes dhe dashurisë vazhdon të frymëzojë aktivitete të shumta edhe sot.
Data 23 prill lidhet gjithashtu me jetën dhe veprën e disa prej figurave më të shquara të letërsisë botërore, si William Shakespeare, Maurice Druon, Halldór Laxness, Vladimir Nabokov dhe Josep Pla.
Që nga viti 1995, UNESCO e ka shpallur zyrtarisht këtë datë si Ditë Botërore të Librit dhe të Drejtave të Autorit. Në këtë kuadër, në shumë vende organizohen panaire libri, lexime publike dhe aktivitete edukative që promovojnë rëndësinë e leximit, sidomos në kohën e dominimit të teknologjisë dhe mediave digjitale.
Kjo ditë vjen si një thirrje e hapur për të gjithë – veçanërisht për të rinjtë – që të rikthehen te libri si burim dijeje, frymëzimi dhe zhvillimi personal. Në një epokë të mbushur me informacione të shpejta dhe të fragmentuara, libri mbetet një mjet i fuqishëm për të thelluar mendimin kritik dhe për të ruajtur trashëgiminë kulturore.
