Angela Price Aggeler është konfirmuar si ambasadorja e re e SHBA-së në Maqedoninë e Veriut, njoftuan përmes “Twitter” shumica e demokratëve në Senat, përcjell Telegrafi Maqedoni.
Ajo zëvendëson Kate Marie Byrnes, e cila ka shërbyer si ambasadore e SHBA në Shkup që nga viti 2019, shkruan “Zëri i Amerikës” në gjuhën maqedonase.
Javën e kaluar, Komisioni i Senatit për Marrëdhëniet me Jashtë mbajti një seancë dëgjimore për emërimin e saj, në të cilën ajo njoftoi se po punon “për të ndihmuar Maqedoninë e Veriut që të zhvillojë një strategji kombëtare ku do kërkohet përgjegjësi nga aktorët e korruptuar”.
“SHBA dhe Maqedonia e Veriut kanë shumë prioritete të përbashkëta, duke përfshirë luftën kundër korrupsionit, përmirësimin e sundimit të ligjit dhe forcimin e qeverisjes së mirë. Nëse konfirmohem, do të inkurajoj reformat në drejtësi dhe do t’u bëj thirrje institucioneve të Maqedonisë së Veriut që të promovojnë transparencën në hetimin e akuzave për abuzime dhe të përballen me vendosmëri kundër korrupsionit, për të forcuar besimin e qeverisë në opinion.
Do të punoj me partnerë ndërinstitucionalë për të ndihmuar Maqedoninë e Veriut të zhvillojë një strategji kombëtare që në mënyrë efektive të mban përgjegjës aktorët e korruptuar.
Nëse konfirmohem, do të punoj për të mbështetur të ardhmen ekonomike të Maqedonisë së Veriut përmes politikave për të forcuar klimën e saj të investimeve, forcimin e infrastrukturës, përmirësimin energjetik, diversitetin dhe sigurinë dhe ndërtimin e rezistencës ndaj ndikimeve të jashtme keqdashëse, duke përfshirë Rusinë dhe Kinën”, tha Aggeler
Aggeler gjithashtu tha se SHBA-të mbështesin Maqedoninë e Veriut në qëllimin e saj afatgjatë për t’u bashkuar me BE-në.
