Mbi 200 gra në Gostivar trajtohen nga kanceri në gji. Kjo shifër alarmante u bë e ditur në debatin e organizuar në Gostivar nga shoqata “Ezra”, e cila merret me mbrojtjen e të drejtave të grave që vuajn nga kanceri në gji, llojet e tjera të kancerit dhe sëmundje tjera. Njomza Shaqiri nga kjo shoqatë thekson se numri mund të jetë edhe më i lartë, pasi mund të ketë gra nga qyteti ynë që trajtohen nëpër qytete tjera.
“Në qytetin tonë nga lista që e kemi marrë nga gjinekologët në spital, në Gostivar janë të regjistruara diku 200 dhe këtu flasim për qytetin. Tani, kësaj liste i shtohen edhe gra të cilat kurohen në vende të tjera, numri nuk është i vogël dhe prandaj vetëdijësimi për zbulim të hershëm, është shumë i rëndësishëm”, deklaroi Njomza Shaqiri, aktiviste pranë shoqatës “Ezra”.
Pacientja më e re e diagnostikuar me kancerin e gjirit në Gostivar është 19 vjeçe, kurse më e moshuara ka 80 vjet. Miranda Ramadani Izairi, mjeke radiologe pranë Spitalit të Gostivarit tha se kjo sëmundje prek të gjitha grup-moshat, por më shumë ato të moshës 45-50 vjeçare.
“Kemi paciente të moshës 19 vjeçare e cila diagnostifikohet në shtetin tonë, mirëpo ka një shërueshmëri relativisht pozitive. Pastaj kemi pacientë të moshës 80 vjeçare, kurba më e lartë e diagnostifikimit të karcionimit të gjirit është 45 deri 50 vjeçare”, deklaroi Miranda Ramadani Izairi, mjeke radiologe pranë Spitalit të Gostivarit.
Diagnostifikimi i hershëm në 90 përqind të rasteve sjellë shërim të plotë të kësaj sëmundje, tha mjekja Ramadani Izairi.
“90 për qind e pacienteve të cilat diagnostifikohen në periudhë të hershme, ato janë 100 për qind të shërueshme. Diagnostifikimi i hershëm i karcinomit të gjirit ka një shërueshmëri shumë të lartë në krahasim me diagonstifikimin e vonshëm”, deklaroi Miranda Ramadani Izairi, mjeke radiologe pranë Spitalit të Gostivarit.
Kjo punëtori me nxënëse të shkollave të mesme erdhi nga shoqata “Ezra” me rastin e muajit tetor, njohur ndryshe si muaji rozë për vetëdijësim të popullatës mbi kancerin e gjirit. Ndryshe, komuna e Gostivarit para dy muajsh ka themeluar edhe komision për mbrojtjen e të drejtave të pacientit, ndërsa tani mundëson falas edhe 50 mamografi për gjininë femërore së bashku me një ordinancë private nga Gostivari.
