Njohja e Kosovës nga Serbia në fund të një marrëveshje mes dy shteteve, Procesi i Berlinit si prioritet dhe mbështetja për liberalizimin e vizave për Kosovën ishin disa prej mesazheve kryesore të Kancelarit gjerman Olaf Scholz gjatë vizitës së tij në Prishtinë, e para në Ballkanin Perëndimor.
Scholz tha se është shumë e rëndësishme për Kosovën që të vazhdojë dialogu i ndërmjetësuar nga BE-ja.
Ai e bëri të qartë se Serbia duhet ta njohë Kosovën sepse, siç tha Schoz është e paimagjinueshme që dy vende që nuk e njohin njëra tjetrën të jenë në BE, shkruan Reporteri.net.
“Gëzohem që po vizitoj Kosovën si vendin e parë në Ballkanin Perëndimor. Ne kemi biseduar për perspektivën evropiane të Kosovës dhe liberalizimin e vizave si dhe për pozicionimin e Kosovës karshi luftës në Ukrainë. Me rëndësi për Kosovën është që dialogu i ndërmjetësuar nga BE të shkojë përpara. Lajçak e ka mbështetjen tonë të plotë. Dialogu është vendi që i hapë Kosovës rrugën drejt perspektivës evropiane. Marrëveshja në fund duhet të zgjidhë edhe çështjen e njohjes së Kosovës sepse është e paimagjinueshme që dy vende që se njohin njëri tjetrin të jenë në BE.
I pyetur për mosvënien e sanksioneve nga ana e Serbisë, ndaj Rusisë, Kancelari gjerman, Olaf Scholz, tha se kushdo që dëshiron të bëhet anëtare, duhet të shkojë në harmoni me vendimet e BE-së.
“Kush bëhet anëtarë i BE-së duhet ta pranojë të gjithë regjimin që vjen bashkë me të. Po flas për rregullat e përbashkëta të cilat i kemi zhvilluar. Duhet ta pranojë legjislacionin, demokracinë, hapjen, transparencën, dhe këtu bën pjesë politika e përbashkët ndaj vendeve tjera, dhe po ashtu regjimi i sanksioneve që e ka vendosur BE ndaj Rusisë, dhe kjo duhet të pranohet nga një vend që synon anëtarësimin në BE”, u shpreh Scholz.
Pas vizitës në Kosovë, Scholz sot pritet të udhëtojë drejt Beogradit ku do të takohet me kryeministrin serb, Aleksandar Vuçiq.
