Dhjetë vjet pas largimit, ushtarët gjermanë do të shkojnë sërish në Bosnjë-Hercegovinë. Vendimin për këtë e mori qeveria gjermane një ditë më parë. Vendimi parashikon dërgimin e deri 50 ushtarëve në kuadër të misionit EUFOR/Altea. Kontingjenti i parë me 25 pjesëtarë të Bundesvehrit pritet të niset në Bosnjë-Hercegovinë në muajin gusht. Mandati është parashikuar për një vit. Para se të hyjë në fuqi ai duhet të miratohet nga Bundestagu “Gjermania do të japë ndihmesën e saj në ruajtjen e stabilitetit në prag të zgjedhjeve, në tetor 2022”, tha zëdhënësi i qeverisë gjermane, Shteffen Hebeshtrait . Zëdhënësi i Ministrisë së Mbrojtjes, David Helmbold, tha se kontingjenti i parë do të jetë nën 50. Një pjesë do të vendosen në Komandën Qendrore në Sarajevë, kurse një pjesë tjetër në terren me ekipe vëzhguese dhe ndërlidhëse dhe do të monitorojnë gjendjen në vend. “Ata do të shërbejnë si sy e veshë për misionin, në mënyrë që, në rast nevoje, të reagohet me shtim forcash”, tha Helmbold. Mandati pritet të miratohet nga Bundestagu javën e ardhshme. EUFOR ALTHEA përbëhet nga 18 ekipe vëzhguese dhe ndërlidhëse. Batalioni ndërkombëtar në kampin Butmir, Sarajevë, mbështet organet e sigurisë në Bosnjë-Hercegovinë. Veç kësaj EUFOR ALTHEA mban në dispozicion një trupë ndërhyrëse në rast keqësimi të gjendjes.Nisur nga tensionet e krijuara kohëve të fundit ndërmjet etnive, komandanti aktual i EUFOR-it ka thirrur katër kompani të njësisë rezervë, pra, gjithsej deri në 500 ushtarë.
