Javën e ardhshme për herë të parë do të mbahet me prezencë fizike seanca e Këshillit për Reformat në Sistemin Gjyqësor, ku do të shqyrtohet Strategjia e Zhvillimit të Gjyqësorit 2023-2027. Ministri i Drejtësisë, Krenar Loga i ka bërë ftesë VMRO DPMNE-së për të marrë pjesë në seancë dhe për të dhënë komente për Strategjinë.
Në takimin me koordinatorët e grupeve parlamentare të LSDM-së, Jovan Mitreski, të VMRO DPMNE-së, Nikolla Micevski, të BDI-së, Arbër Ademi dhe të Aleancës të Shqiptarët, Adnan Neziri, ku mori pjesë edhe zëvendësministrja e Drejtësisë, Viktorija Avramovska Madiq, u diskutua për situatën me Këshillin Gjyqësor dhe mundësinë e ndryshimeve ligjore për të tejkaluar problemet me të cilat ballafaqohet ky institucion.
Ministri i Drejtësisë, Krenar Loga informoi për axhendën legjislative, mundësinë e miratimit të ligjit për amnisti sipas shembullit të vitit 2018, për krimet e lehta, i cili do të mundësojë lehtësimin e burgjeve.
U hapën edhe temat e ligjit për falje, AOT, ASK, Prokuroria Publike, Kadastra, të drejtat e fëmijëve e të tjera.
Koordinatorët e grupeve parlamentare falënderuan ministrin e Drejtësisë, Krenar Lloga për informacionet që ndau dhe shprehën gatishmërinë për bashkëpunim të mëtejshëm.(INA)
